Tashqi ishlar sahifasiga xush kelibsiz

COVID-19: Yevropa Ittifoqi hududiga zarur bo'lmagan safarlar uchun vaqtinchalik cheklov 2020 yil 15 iyun oyiga qadar uzaytirildi 

20.04.2020 - Maqola

Germaniya Federal Hukumati Yevropa Komissiyasining 2020 yil 8 mayda qabul qilingan tavsiyalariga amal qilishga qaror qildi va COVID-19 kasalligining kirib kelishi va koronavirusning yanada tarqalishini oldini olish maqsadida uchinchi davlatlardan Germaniyaga barcha zarur bo'lmagan safarlar uchun amaldagi kirish cheklovini yana 30 kunga uzaytirdi. Yevropa Ittifoqiga a'zo davlatlarning davlat va hukumat rahbarlari tomonidan 2020 yil 17 martda qabul qilingan Shengen zonasiga kirishga qo'yilgan cheklovlar Germaniyada, boshqa Yevropa Ittifoqi mamlakatlarida bo'lgani kabi, 2020 yil 15 iyungacha amal qilishda davom etadi. Federal Ichki Ishlar Vazirligining Shengen chegaralari to'g'risidagi kodeksining 14 moddasi va 6-moddasiga asoslangan amaldagi buyrug'iga binoan harakatlanish cheklovlari quyidagi shaxslarga nisbatan qo'llanilmaydi:

  

1. vataniga yoki doimiy yashash manziliga qaytayotgan Yevropa Ittifoqiga a'zo mamlakat hamda Shengen shartnomasi doirasida Yevropa Ittifoqi bilan assotsiatsiya shartnomasini tuzgan davlatlar fuqarolari va ularning oila a'zolari hamda Buyuk Britaniya, Lixtenshteyn, Islandiya, Norvegiya va Shveytsariya fuqarolari va ularning oila a'zolari, agar qaytish uchun boshqa alternativ yo'nalish mavjud bo'lmasa

2. doimiy yashash manziliga qaytayotgan uchinchi davlat furqarolari, agar ular Yevropa Ittifoqiga a'zo biror bir mamlakatda va/yoki yuqorida qayd etilgan mamlakatlarning birida uzoq muddatli yashash uchun ruxsatga ega bo'lsa (yashash uchun berilgan ruxsatnoma, uzoq muddatli o'qish yoki mehnat faoliyatini olib borish uchun viza)

3. „Muhim vazifalarni“ (essential functions or needs) bajaruvchi uchinchi davlat fuqarolari. Qarorga muvofiq ushbu guruhga quyidagi shaxslar kiradi:

 

  • tibbiyot xodimlari va tibbiyot sohasida ilmiy-tadqiqot ishlarini olib boruvchi hamda kasallarga qarovchi shaxslar,
  • chegaralararo migrantlar, yuk tashish sohasidagi va boshqa zarur sohalardagi transport kompaniyalari hodimlari,
  • diplomatlar, xalqaro tashkilotlar hodimlari, harbiylar, gumanitar tashkilot xodimlari, agar safar xizmat vazifalarini bajarish maqsadida amalga oshirilayotgan bo'lsa,   
  • tranzit yo'lovchilar,
  • muhim oilaviy sabablar tufayli kirib kelayotgan yo'lovchilar,
  • xalqaro himoyaga muhtoj yoki boshqa gumanitar sabablar tufayli kirib kelayotgan shaxslar.   

Harakatlanish to'g'risida qo'shimcha ma'lumot:

Bundan tashqari, Avstriya, Shveytsariya va Frantsiya bilan ichki chegaralarda vaqtincha qayta o'rnatilgan chegara nazoratini hozircha 2020 yil 15 iyungacha uzaytirish to'g'risida qaror qabul qilindi. Ushbu tartib Italiya va Ispaniya davlatlari bilan bo'lgan havo chegaralariga ham tegishli.

Daniya bilan chegarada chegara nazorati hozircha davom ettiriladi. Chegara nazoratini to'xtatish sanasi Daniya hukumati bilan kelishilgan holda belgilanadi.

Quruqlik chegaralaridagi nazoratning amaliy ko'rinishi esa soddalashtiriladi. Transchegaraviy transport vositalarining chegarani kesib o'tishiga qaytadan ruxsat beriladi. Endilikda nazoratlar tizimli ravishda emas, balki moslashuvchan va tavakkalni inobatga olgan holda olib boriladi. Umumiy qoida bo'yicha kirish uchun asosli sababning mavjud bo'lishi talabi saqlanib qolinadi, ammo oilaviy yoki shaxsiy sabablarga ko'ra amalga oshiriladigan safarlar uchun qo'shimcha yengilliklar yaratiladi. Bu boradagi tafsilotlar hali ma´lum emas.

Lyuksemburg bilan chegarada 2020 yil 15 may sanasi yakunlanishi bilan chegara nazoratlari tugaydi.

Kirib keluvchilar va qaytuvchilar uchun karantin qoidalari:

Federatsiya va federal yerlar darajasida davlat hududiga kirayotganlar va qaytayotganlar uchun umumiy karantin qoidalari asoslari kelishib olindi. Qo'shimcha ma'lumotlar (shu jumladan ingliz tilida), namunaviy matn va qo'shimcha havolalar Federal Tashqi ishlar vazirligi va Federal Ichki ishlar vazirligi veb-saytlarida mavjud; Ayrim federal yerlar hududida tadbiq etilayotgan aniq chora-tadbirlar to'g'risidagi ma'lumotni tegishli federal yerlarning sog'liqni saqlash vazirliklari veb-saytlaridan topish mumkin.

                                                                                     

 

Sahifa boshiga qaytish